Добре Михајлов:
„Драги матуранти на СУГС „Владо Тасевски“,
Денес, со срце полно емоции, ви се обраќам – не само како наставник, директор, пријател, туку пред сè како некој што со гордост ве гледал како растете, созревате и се оформувате во млади, свесни, одговорни луѓе.
Овој ден е повеќе од обична прослава. Тоа е симбол на вашата истрајност, вашите жртви, радости, соништа и сите мали и големи победи кои ве доведоа до тука. Можеби не секогаш беше лесно, но вие покажавте дека секој предизвик може да се надмине со срце, труд и поддршка.
Четири години поминаа брзо – исполнети со учење, другарства, смеење по ходници, неочекувани тестови, незаборавни екскурзии, математики што ви ја мачеле душата и професори што, иако понекогаш строги, секогаш веруваа во вас.
Сега, пред вас е нов почеток. Без разлика дали вашиот пат ќе продолжи на факултет, во некоја нова професионална приказна или можеби надвор од границите на оваа земја – не заборавајте од каде потекнувате. Не заборавајте ги пријателствата што ги создадовте тука, часовите кои ве научија на многу повеќе од теорија, и сите оние мали моменти кои ја создадоа вашата средношколска приказна.
Горди сме на секој еден од вас. Ви посакуваме храброст да сонувајте големи соништа, сила да ги остварите, и мудрост да останете свои – скромни, добри и упорни.
Честита матура, генерацијо 2025!“
